新服務:私隱八達通

蒙能怒插大浪西

起你個錨講乜

今日小妹靜雞雞去咗書展, 打咗個轉, 睇吓自己本書點樣被人看待. 大眾書局都好幫手, 今日將本書擺咗出去. 但有兩件事就好深印象.

第一, 有個欵似愛國人士嘅阿叔, 拎起小妹本起你個錨, 立左兩立, 然後不屑咁講: 啲人真係好無聊! oh my god, 書展有好多書都好"無聊", 各有所好啫, 我唔覺得譏諷功能組別鬧保皇黨好無聊囉! 咁嘅氣氛, 正正係要大家出出氣嘛!

第二, 話明本書兒童不宜架啦, 因為政治咁鬼污穢, 梗係兒童不宜, 但有條肥嘟嘟嘅小朋友, 拎住本書煲咗好耐, 一路煲一路笑, 仲要同個同學仔係咁品評, 但係又唔拎去俾錢, 係咁打書釘, 激鬼死!

或者好多人唔知本書講乜嘢. 不如等小妹簡介下. 呢本書係好有教育意義, 係借用咗好多高官和議員嘅說話和言行, 做教材, 教導大家從政之道係乜. 例如你係高官, 面對教師嘅質問, 你應該點回應呢? 你係功能組別議員, 遇到八十後包圍, 你又應該點樣脫身呢? 咁有教育意味嘅一本書, 竟然俾阿叔話無聊, 真係傷透小妹嘅心心!

呢本書主要涉及幾方面: 功能組別, 保皇黨, 特首, 各位表現出色嘅高官, 議員, 特首, 總之係政壇出色嘅人物. 仲有好多實例, 包括高官和議員教你英文.

呢本書仲有兩個心理測驗, 包括"你是否適合參選功能組別", 和"你是否適合加入保皇黨", 保證看完後, 你會有非常快樂的心理. 另外仲加插咗好多廣告, 保證笑到碌地.

但本書絕不適合兩種人: (1) 道貌岸然毫冇幽默感, 乃小妹最討厭的類型; (2) 你係親中愛國人士, 或係支持功能組別人士, 呢類人絕不宜看, 因為你地嘅政治技巧已超晒班, 呢本書講嘅只係小毛見大毛.

希望大家買番本, 消下暑氣也消下怨氣, 支持小妹, 唔好好似個肥仔咁係度打書釘啊!


P.S. 小妹已開了facebook和twitter, 歡迎做個friend:

siulomao@gmail.com

專治政無能之起你個錨

我叫毛小璐, 啱啱喺書展出咗本書, 叫做"專治政無能之起你個錨", 喺大眾書局攤位有得賣:




呢本書唔係非一般嘅政治笑話, 唔係次文化堂果隻咁低質素, 係我嘔心嚦血創作, 真係有質素, 唔單止好笑, 仲有insight, 教大家點樣分辨政無能嘅語言和行為.

可惜, 香港嘅出版空間越嚟越窄咁樣, 反諷喺外國係一種好獨特的文體, 但中國人受盡儒家荼毒, 成日以為獨立思考係罪, 反諷係不敬君皇, 誰不知所有民主自由國家, 反諷文章同電視劇, 話劇都非常盛行. 但今年書展, 連次文化堂都無呢類作品, 咁點得架?

最慘係, 出版社話, 傳媒都對呢本野反應麻麻. 唉, 傳媒唔係一早歸晒邊咩? 邊有反應吖. 寫呢類書又唔似去圍民主黨話人癌上腦咁有畫面, 傳媒更唔會有人注意.

咁我唯有上網珍症, 希望盡點綿力, 醫治好香港嘅政無能啦!


我懇請大家, 去開書展, 去大眾書局望望, 呢本絕對唔係粗製濫造嘅笑話書嚟架, 買番本啦, 好心啦!


P.S. 我寫blog都會用廣東話, 因為: (1) 反正大陸唔會睇到; (2) 要捍衛廣東話; (3) 夠到肉抵死呀!